𝐄𝐮𝐠𝐞𝐧𝐞 𝐆𝐞𝐢𝐛𝐫𝐢𝐞𝐥𝐥𝐞 𝐀. 𝐍𝐚𝐜𝐢𝐧𝐨, h𝐢𝐧𝐢𝐫𝐚𝐧𝐠 𝐧𝐚 𝐌𝐚𝐤𝐚𝐭𝐚 𝐧𝐠 𝐓𝐚𝐨𝐧 2026

Gagawaran ng Komisyon sa Wikang Filipino (KWF) si Eugene Geibrielle A. Nacino ng KWF Talaang Ginto: Makata ng Taon 2026 pára sa kaniyang tulang: “Asín sa Hasang ng Lupà.” Makatatanggap siyá ng PHP30,000.00 (net), tropeo, at medalya.

Nagwagi naman si Joseph E. Cemena ng Ikalawang Gantimpala pára sa kaniyang tulang “Lubid ng mga Tinig.”

Makatatanggap siyá ng PHP20,000.00 (net) at plake.

Nanalo rin si Romeo P. Peña sa kaniyang tulang “Mina Extraer” ng Ikatlong Gantimpala. Makatatanggap siyá ng PHP15,000.00 (net) at plake.

Itinanghal bilang Mga Karangalang Banggit sina Emersan D. Baldemor sa kaniyang tulang “Panagdait Field Theory” at Mark Anthony S. Angeles sa kaniyang tulang “Mga Ártepákto ng Naritó at Ngayón.”

Si Eugene Geibrielle A. Nacino ay kasalukuyang nag-aaral sa Saint Louis University na may kursong Bachelor of Science in Medical Laboratory Science. Nagsilbi siyang Punong Patnugot ng “Ang Banaag” na opisyal na lathalain ng Bangui National High School. Nakapaglathala ng tatlong (3) akdang pampanitikan sa Bannawag Magazine at nagwagi sa iba’t ibang timpalak sa pagsulat ng tula gaya ng Mga Tala at Tula at Maestra Mercedes Pundador Awards.

Ang Talaang Ginto: Makata ng Taón ay isang patimpalak sa pagsúlat ng tulâ na itinaguyod ng KWF na naglalayong pasiglahín at pataasín ang urì ng panulaang Filipino sa pamamagitan ng pagkilála sa mga batikan at baguhang talino at tinig sa sining ng tulâ.

Ang KWF Araw ng Parangal 2026 ay gaganapin sa 29 Abril 2026.